بلاد معروفك بحكمت تاريخها و بعض مفكريها ، معروفة بشجاعة رجالها من قديم العهد ضد العدو و المستعمر و الخائن، طبيعي بما انو تعاقبت عليها حضارات حربية غنية عن التعريف... لاكن هالتعريف الغاية فالاختصار متناقض تماما مع احداث الاربعة سنوات الاخيرة، 2011/2015 بعد انتفاضة قصيرة المدى تداول على التنكيل بها ساسة العالم و اصبحت مركز تنفيذ المخططات القذرة فالعالم الثالث الغني بالثروات الطبيعية و الفقير بمدى ذكاء شعبها...
تونس صار فيها حاجات ترمز الى تهاوي اسمها!
- تتفكرو احداث الدم فالرديف 2008؟ الي ماتو و تجرحو فيها عباد رجال مقبلوش الظلم و حبو عالكرامة!
- تتفكرو احداث ديسمبر 2010/فيفري 2011؟ الي ماتو و تجرحو فيها ناس رجال مقبلوش الضلم و حبو عالخبزة و الكرامة!
- تتفكرو احداث الاعتداء تع 9 افريل 2012 الي ماتو و تجرحو و تقمعو فيها عباد رجال غارو على دم ولاد بلادهم و حبو يعبرو!
-تتفكرو احداث سليانة و الرش الي ماتو و تجرحو فيها رجال و عباد خرجو عالضلم و الحرية و وقف الممارسات الدنيئة في ادارة البلاد!
-تتفكرو احداث 6 فيفري و 25 جويلية وقت دخول تونس للتاريخ بزوز اغتيالات سياسية دنيئة الشهيدين البراهمي و بلعيد!
-تتفكرو احداث الاعتداء الفاحش على الاتحاد العام التونسي للشغل اعرق منظمة في تونس من قبل جرذان رابطات حكاية الثورة؟
-تتفكرو لطفي نقض و باقي ضحايا التفرقة الحزبية؟
-تتفكرو احداث سفارة امريكا و السلفيين المغرر بهم الي ماتو ضحية السياسة؟
-تتفكرو احداث باردو و جنازتا شكري بلعيد و البراهمي و كيف تم الاعتداء على الناس من قبل البوليس والميليشيات؟
-تتفكرو الجنود و الامنيين الي ماتو ضحية اللعبة القذرة السياسية تحت غطاء ارهاب و جهاد؟
-تتفكرو الناس الي تشدو فالحبس خاطر حاربو الضلم بالمظاهرات و الا القلم و الا اللسان؟
تتفكرو الباقي الكل؟ الي صار في تونس مهد الحضارات و مرفوعة الجاه فالعالم؟
السياسة و المجتمع، اثنان لا يفترقان! السياسة القذرة قوية بالشعب المغفل المفعول به...
و توا تحكيو على انتخبات قائمة على ديمقراطية... ايه نعم ديمقراطية من غير محاسبة، ملطخة بدماء و دموع احرار جعلو ممارسي السياسة ابطال طليقي اللسان...
''الابطال يموتون و الانذال يدخلون التاريخ''
# جهاد مبروك
