هل في هذه البلاد ما يستحق ان نعيش من اجله؟
او بالاحرى، الناس الي ثيقتهم مجموعة من الشعب التونسي من 2011 الى اليوم بعد ثورة مزعومة صدقها الشعب مناسيا انها انتفاضة افتكت من غلمان السياسة، هل هم واعون انو شي الي ثارو ضدو راهو مازال و زاد قوى؟
خليني نقول هل ان الحرية و الكرامة اساس حقوق الانسان موجودة في تونس؟
تشدو ناس و تعذبو ناس و فما ناس من ناس... ناس معدها فالسوق ما تذوق و ناس همها و غمها الوحيد هو الحرية و الكرامة و العيشة الشريفة في بلادنا،
على حرية تعبيرهم تشدو...
على المطالبة بحقوقهم تشدو...
على كرامتهم تشدو...
اما زادة على رجولتهم و و انتمائهم لتونس و ايمانهم بحق ايصال المعلومة و كشف الحقائق تخطفو في بلاد الناس و ذلتهم دولتهم الي يحملو هويتها في باسبوراتهم...
سفيان و نذير ذلوهم و نساوهم، ذلتهم الناس الزناديق الي شادة الادارات و الكراسي فالمصالح المختصة بقضيتهم، !!
سفيان و نذير نساوهم الناس الزناديق الي عاملين فيها مدافعين عن حرية التعبير و حقوق الانسان و النقابيين،!!
سفيان و نذير قتلهم شعب تونس الي سكت و تجاهل هالشخصين و بقاو كان ينبرو و يطلعو فالكلامات عليهم و يشوهو فيهم، !!
احنا قلّة من اصحابو، الي نعرفوه و الي من اول مسمعنا وقفنا معاه و حاولنا كل واحد من جهتو يعرف عليه خبر و يشوف حل باش يرجعو، قلّة ماناش باش نبدلو برشا اما نبدلو شوية..
في ليبا هوما مطيشين، لا نعرفو علاهم لا موتا لا حين، لا ماكلين لا شاربين، لا لابسين لا عريانين، لا يبكيو و لا فرحنين! و دولتهم راقدة، فرحانة بانجازها العضيم، قال شنوة ديمقراطية و انتخابات و دولت مؤسسات و حقوق انسان...
تسقط دولتكم و كذبكم و تبلعيطكم و ادواتكم المبتذلة وقت زوز ولاد تونس مدونين و صحافيين ملوحين و لا حس و لا خبر علاهم...
منظمات دولية تحاول، و تونس لا منحاولش، علاش؟ خاطر مهمش ناس، هم مجموعة من الهلاميين، خلقوا في تونس باش يذلونا كشعب عظيم...
سفيان و نذير باش يرجعو كانهم حيين، خاطر مدامهم مظلومين و انتم عليهم ساكتين ينجمو ينظمو امورهم بحنكتهم و ذكاهم و بمساعدت القلّة من اصحابهم الي ما فدوش و هوما يلوجو علاهم...
حتى لو كان ايماني كبير انو فما حكاية سياسة فالوسط و لعبة مسخة اما راجعين هوما و يبقى عاركم يا هلاميين من مسؤولين و نقابات و جمعيات و ناس ناسين و متناسين اولاد بلادكم الي اشرف كنكم و شرفهم مرفوع خاطر تخطفو وهوكا يجيبو فالحقيقة ليكم، في تحقيقهم الصحفي...
كلمات صغار لا تغني و لا تفقر... اما هذا نوع من انواع التظامن باش تعرفو انو اليوم اليوم العالمي للتدوين الي خلى 99% منكم تاخذو حريتكم و تشدو البلاد و خلى منكم يا شعب تنجم تحكي الي تحب و تقول، اليوم العالمي للتدوين الي ولى اليوم العالمي لمساندة سفيان و نذير، الصحافي الاستقصائي و المصور..
#free_sofien #free_nadhir
